Энергетика министрлігі «Қазақстан Республикасының ішкі нарығына тауарлық биржалардан тыс сұйытылған мұнай газын жеткізу жоспары шеңберінде сұйытылған мұнай газын көтерме саудада өткізудің шекті бағасын бекіту туралы» бұйрықтың жобасын дайындады.
Жоба 2025 жылғы 24 маусымға дейін көпшілік талқылауы үшін «Ашық НҚА» порталында орналастырылған. Бұйрықтың қолданылу мерзімінің аяқталуына байланысты шекті көтерме бағаны бұйрықпен қайта бекіту жоспарлануда, деп түсіндірді министрлікте.
- Энергетика министрлігі сұйытылған мұнай газын көтерме саудада өткізудің шекті бағасын 2025 жылғы 1 шілдеден бастап 2025 жылғы 31 желтоқсанға дейінгі кезеңге тоннасына 51 932 теңге деңгейінде сақтауды ұсынады.
Біз 2025 жылдың 1 ақпанынан бастап Қазақстанда сұйытылған газдың көтерме бағасы ҚҚС есептемегенде тоннасына 45 158 теңгеден 51 932 теңгеге дейін өскенін хабарладық. Сауда және интеграция вице-министрі Айжан Бижанова өткен жылдың соңында екі тараптың да мүддесі жатқанын, екі тараптың да проблемасын бірден шешу мүмкін болмай тұрғанын айтты. Ал Энергетика министрлігі қуатты арттырып, тапшылықты жойып, халықты қажетті отын түрімен қамти алатын мерзімді 2030 жыл деп белгілеген. Сол үшін алдағы 5 жыл қатарынан сұйытылған газға шекті бағалар бекітіліп отыратынын мәлімдеді.
Ал сұйытылған газ бағасына қатысты шектеулер 2030 жылға дейін сақталады. Нәтижесінде жанар-жағармай қымбат, газ арзан болады. Бұл көлік жүргізушілерінің жаппай сұйытылған газға көшуіне ықпал етуі мүмкін. Ал елдегі сұйытылған газ тапшылығын ескерсек, мұның соңы күрделене түсуі әбден мүмкін.
