Қазақстанның иелігіне өткен Ыстықкөлдегі төрт пансионат: Міндеттеріміз қандай өзгерістермен жаңарды
14 сәуірде Жогорку Кенештің халықаралық істер жөніндегі комитеті келісімнің шарттарын өзгерту туралы тиісті заң жобасын мақұлдады. Бұл туралы Kaktus Mediaда жазылған.
Экономика және коммерция министрінің орынбасары Искендер Асылқұлов 2006 жылы Қырғызстан мен Қазақстан үкіметтері арасында төрт пансионатты жаңғырту шартымен қазақстандық тарапқа беруді көздейтін келісімге қол қойылғанын еске салды.
Бұл Бостери кентіндегі «Самал» демалыс үйі мен «Университет» спорттық-сауықтыру лагері, Чолпон-Атадағы «Қазақстан» шипажайы және Корумду ауылындағы «Олимп» спорттық-сауықтыру орталығы мемлекеттік кәсіпорнының спорттық-сауықтыру базасы. Бұл ретте, Асылқұлов атап өткендей, бұл құжатта қазақстандық тараптың талаптары мен жауапкершілігі егжей-тегжейлі жазылған жоқ.
2023 жылы қазақстандық тараптың жауапкершілігі бөлігінде келісімнің шарттары қайта қаралды, ал 2024 жылғы желтоқсанда 2006 жылғы келісімге өзгерістер енгізу туралы хаттамаға қол қойылды.
Жаңа құжатқа сәйкес, Қазақстан нысандарды реконструкциялауды 2029 жылдың 31 желтоқсанына дейін аяқтауға міндеттенеді.
Атап айтқанда: «Қазақстан» шипажайы төрт жұлдызды қонақ үй деңгейіне дейін, «Университет» және «Самал» — үш жұлдызды қонақ үй деңгейіне дейін жаңғыртылуы тиіс, «Олимп» толыққанды спорт базасы болып қайта құрылуы тиіс.
«Егер бұл шарттар бес жыл ішінде орындалмаса, нысандар шығын өтемінсіз Қырғызстанның меншігіне қайтарылады», — деп түсіндірді қырғыз шенеунігі.
Ол сондай-ақ бұған дейін келісімде Қырғызстан азаматтарының қайта құру үдерісіне қатысуы көзделгенін атап өтті. Бастапқыда жұмысшылардың 80 пайызы қырғызстандықтар болуы тиіс деп болжанған, алайда енгізілген өзгерістерден кейін бұл үлес 90 пайызға дейін ұлғайтылды.
Қазақстан үшін базаларды қалпына келтіру және туризмді дамыту міндеті тұр. Шарттың талаптарына сүйене отырып, Қазақстан пансионаттарды ретке келтіру міндетін өзіне алады. Барлық нысандар жөнделіп, үш-төрт жұлдызды санаттағы қазіргі заманғы қонақ үйлер деңгейіне дейін қайта жабдықталуы тиіс.
Сонымен қатар, олар тек жаз айларында ғана жұмыс істемей, жыл бойы туристерді қабылдауға тиіс.
Яғни, ғимараттар жылытылады, инфрақұрылым жақсарады, қосымша жайлылық пайда болады, ал демалыстың өзі екі елдің азаматтары үшін ыңғайлы әрі қолжетімді болады.
Қазақстан да осы нысандарды күтіп ұстау мен дамытуға жауап береді және егер ол келісім шарттарын орындамаса, онда пансионаттар Қырғызстанның бақылауына қайтып оралады.
Пансионаттар Орталық Азияның ең танымал курорттық өңірлерінің бірінде орналасқан.
