Бұл жағдайды Мемлекеттік аудит анықтады. Мем.аудит назарына ілініп қалған нысанның 2.1 млрд теңгені қалай ұстағаны, қай банк депозитіне ұстағаны жайлы мәліметтер айтылған жоқ.
«Павлодар облысы әкімдігінің ведомстволық бағынысты ұйымдарының бірі мемлекеттік қаражатты пайдалану кезінде қаржылық тәртіпті бұзды» Жоғары аудиторлық палатаның баспасөз қызметі.
«Қазынашылық комитетінің мемлекеттік аудиті кезінде аймақтағы квазимемлекеттік компаниялардың бірінің қолма-қол ақшаны бақылау шотында 3 жылдан астам уақыт бойы 2,1 млрд теңгеден астам қаражат бар екені және пайдаланылмайтыны анықталды. Павлодар облысының әкімдігіне аталған қаражатты одан әрі пайдалану бойынша шаралар қабылдау тапсырылды. 18 наурызға «Қазақтелеком» АҚ пайдасына бұрын жасалған келісім-шарт аясында 2 млрд теңгеден астам қаржы аударылды «, — делінген хабарламада. Қосымша 114 млн теңгеден астам қалдықты пайдалану туралы шешім қабылданады.
Бұл мәселе Жоғары аудиторлық палатаның бақылауында қалады.
26 наурызда Мәжіліс депутаты Марат Бәшімов депутаттық сауалында Жоғары аудиторлық палатаның төрағасы Әлихан Смайыловқа «2022-2024 жылдардағы тексерулердің нәтижелерін дереу жариялауды» талап етті.
Ол қоғамның маңызды аудиторлық қорытындылар туралы уақытылы хабардар етілмеуіне алаңдаушылық білдіретінін атап өтті. Атап айтқанда, Жоғары аудиторлық палатаның сайтында 2022 жылдан бастап жүргізілген тексерулердің нәтижелері әлі күнге дейін жоқ. Соңғы жарияланған қорытынды 2022 жылғы 11 тамызда жасалды.
Айта кетейік, Жоғары аудиторлық палатаның төрағасы Әлихан Смайылов оңтүстік облыстар мен Ұлытау облысында 1 мыңнан астам адам салық органдарында кәсіпкер ретінде тіркелместен 1,5 млрд теңгеге субсидия алғанын хабарлады.
Сарапшылардың айтуынша, мұндай жағдайлар біздің ел үшін қалыпты құбылысқа айналып кеткен. Тек бірер жылдан бері бюджет қаржысын игере алмагандардың қаржысы бюджетке қайтарылатыны ашық айтыла бастады.
