Мәдениет және ақпарат министрі Аида Балаеваның айтуынша, Қазақстанда креативті индустрияны дамыту қоры құрылады.
Министр бұл ұсынысты бүгін үкімет қабырғасында өткен жиында айтты.
Министр Балаеваның айтуынша, мұндай құрылымдар әлемнің жетекші елдерінде де бар.
Ұлыбританияда – Creative England (Креатив Ингланд) қоры, Оңтүстік Кореяда – Creative Korea (Креатив Корея) қоры жұмыс істейді. Бұл қор корей мәдени толқынын дамытудың негізгі операторы саналады.
«Қазақстандағы Креативті индустрияларды дамыту қорының бюджеті ұлттық лотерея операторы қызметінен бөлінетін 3% аударым есебінен қалыптастырылады. Оның қызметінің басты бағыттарының бірі креативті индустриялар саласында венчурлік инвестициялауды дамыту. Осыған байланысты АХҚО базасында басқарушы компаниялар пулын тарта отырып, венчурлік бөлімше құрылады, олар ақшалай қаражатты мерзімділік пен қайтарымдылық негізінде тиімді орналастыруға ықпал ететін болады», деді Балаева.
Кейіннен премьер-министр Олжас Бектенов 1 шілдеге дейін Креативті индустрияны дамыту қорын құруды тапсырды.
«Оның негізгі мақсаты инвестиция тарту, жобаларды қаржыландыру және өнімдерімізді экспорттауға жәрдемдесу болуы тиіс. Өңірлік ерекшеліктерді ескере отырып, шығармашылық жобаларды мемлекеттік қолдаудың нақты шараларын енгізу қажет. Сондай-ақ, жыл соңына дейін 2026-2030 жылдарға арналған креативті салаларды одан әрі дамыту тұжырымдамасын әзірлеуді тапсырамын «, — деп атап өтті ол.
Бұдан басқа, Ақмола, Алматы, Жетiсу, Батыс Қазақстан, Жамбыл, Қарағанды, Қостанай, Павлодар облыстарының әкiмдiктерi ағымдағы жылдың соңына дейiн облыс орталықтарында креативтi хабтар құруы қажет. Олардың базасында жобаларды қаржыландыру үшін сала өкілдерінің инвесторлармен өзара іс-қимылы бойынша алаңдар пайда болуы тиіс.
Аталған тапсырмалардың орындалуын вице-премьер Ермек Көшербаев бақылайтын болады
