Парламент мәжілісінде өткен отырыста Ұлттық экономика вице-министрі Азамат Әмрин 2026-2028 жылдарға арналған әлеуметтік экономикалық даму болжамы таныстыру кезінде осындай үміт барын айтты.
Вице-министрдің бұл жаңалықты бөле-жара айтуының себебі бар. 2006 жылы Қазақстанда донор аймақтардың саны – 12 болса, қазір олардың қысқарып кетті. Сондай -ақ тек Маңғыстау ғана емес, 2028 жылы Павлодар облысы өзін-өзі қамтамасыз ететін өңірге айналу мүмкіндігі бары айтылды.
Айта кетейік, Қазақстанда бюджетке тәуелді аймақтар көп. Қаржы тапшы аймақтар қатарында Оңтүстік Қазақстан өңірлері тұр. Мәселен, 2025 жылы республикалық бюджеттен еліміздің 17 өңіріне 5,7 трлн теңге субвенция бөлінсе, оның үлкен көлемі осы оңтүстік өңірлерге бағытталған.
Жоспарға сәйкес, өңірлердің кірістері 2026 жылы – 10,7 трлн теңгеге, 2028 жылы – 13,3 трлн теңгеге артып, 124,3%-ды құрайды.
Алдын-ала есеп бойынша бюджеттік субвенциялар мынадай көлемде болжанып отыр:
2026 жылы – 5,1 трлн теңге;
2027 жылы – 6,4 трлн теңге;
2028 жылы – 6,8 трлн теңге.
Ұлттық экономика министрлігі алдағы 3 жылдықта кейбір өңірлердің субвенциялардан бас тартып, өзін-өзі толық қамтуға көшетінінен де үмітті.
«2028 жылы Павлодар облысы өзін-өзі қамтамасыз ететін өңірге айналады, ал Маңғыстау облысы қайтадан донор мәртебесіне ие болады. Біздің бағалауымыз бойынша жергілікті бюджеттердің республикалық бюджет қаражатына тәуелділігі орта есеппен 50,7 пайыздан 33 пайызға дейін төмендейді», – деді Әмрин.
