Қазақстан қор биржасының жаңа төрағасы Әділ Мұхамеджанов Алматыда журналистермен кездескен кезде қор биржасының Ұлттық банкпен бірге цифрлық құралдарға қатысты заң жобасын әзірлеуге қатысқанын айтып берді.
«Біз қазір қандай құралдар қызықты екенін түсіну үшін сауда-саттыққа қатысушылармен тарту жағынан да, инвестиция жағынан да белсенді өзара іс-қимыл жасауға тырысамыз. Жаңа құралдарға келетін болсақ, біз биржада жаңа ETF және инвестициялық қорлардың пайда болуын күтеміз. Сондай-ақ акциялардың әлеуетті эмитенттерімен белсенді жұмыс істейміз. Биыл тағы да жаңа орналасуларды ынталандыруға тырысамыз», дейді Әділ Мұхамеджанов
Бұдан басқа, KASE болашақта цифрлық қаржы активтерінің жаңа бағытын дамытуға қатысуды жоспарлап отыр. Ол Ұлттық банк нарық қатысушыларымен бірге цифрлық қаржы активтері туралы заңды қабылдау және аяқтау сатысында екенін еске салды.
Спикер атап өткендей, цифлық теңге қор нарығына айтарлықтай әсер етуі мүмкін. «KASE осы бағытты дамытуға қатысатыны сөзсіз. Заң қабылданғаннан кейін осы құралдың архитектурасын және оның жұмыс істеу қағидаттарын толық түсінуді қалыптастыруға болады» дейді Әділ Мұхамеджанов.
Журналистер жаңа Салық кодексінің нарыққа қаншалықты әсер еткені жайлы да сұрады. Спикердің айтуында, бұл бағыт қор биржасының бақылауында тұр. «Қазақстан қор биржасына берілетін жеңілдіктердің көпшілігі сақталды, сондықтан айтарлықтай әсер бола қоймайды деп сенеміз. Бірақ сол болжам аясында біршама күрт құбылыс болғанын көрдік. Ол да барынша қалпына келеді деп ойлаймын», – деп атап өтті Әділ Мұхамеджанов.
Қор нарығындағы тағы бір құбылыс – Forte Bank акцияларының күрт өсіп кетуі. Өткен аптада банк акциялары 7 теңгеден бірден 38 теңгеге дейін қымбаттады. Құнды қағаздар бірден үш есе өсіп, шырқау шегінде 44 теңгеге дейін жеткен еді. Нарық қатысушылары бұған Forte-нің Home Credit банкін сатып алуы себеп деп түсіндірген еді. Әділ Мұхамеджанов сөзінше, акционерлердің дивиденд төлеуі жайлы жаңалық та ықпал еткен.
«Акцияның өсуіне – дивиденд төленеді деген акционерлердің шешімін күту әсер етті, одан бөлек спекуляциялық себеп болуы мүмкін. Бірақ акция нарығында «салқындау» процесі жүріп жатқанын байқадық. Ол жерде нақты бір ғана ойыншы болған жоқ, қатысушылар үлесі айтарлықтай көп болды», – деді ол.
