Қазақстанда банктерді қадағалау күшейтіліп, оларды лицензиялау және ашу тәртібіне қойылатын талаптар өзгертіледі. Осы және басқа да нормалар «Банктер және банк қызметі туралы» заң жобасында, сондай-ақ сәрсенбі күні жалпы отырыс барысында мәжіліс жұмысқа алған қаржы нарығын реттеу және дамыту мәселелері бойынша ілеспе түзетулерде ұсынылған.
Мәжіліс депутаты Татьяна Савельеваның айтуынша:
- Банктік қадағалау күшейтіліп, банктерді ашу және лицензиялау тәртібіне қойылатын талаптар өзгереді.
- Бұл блоктағы негізгі бастамалардың бірі базалық банктік лицензияны енгізу болып табылады.
- Жаңа банктердің нарыққа кіру шарттарын жеңілдетеді және бәсекелестікті арттырады, сондай-ақ бизнесті кредиттеуге оң ықпал етеді.
Сонымен қатар, оның айтуынша, қаржы ұйымдарының басшылары үшін стандарттар арттырылып, басқармаға кәсіби дайындықтан өткен және адал ниетті мамандар ғана келеді. Сондай-ақ төлем қабілеті жоқ банктерді реттеу тетігі енгізіледі, проблемалық банктердің қаржылық тұрақтылығын қалпына келтірудің жаңа тәсілдері енгізіледі, олар салымшылардың мүдделерін қорғауға және қаржы жүйесінің тұрақтылығын сақтауға мүмкіндік береді. «Заң жобаларында банктердің еншілес ұйымдарының қызметін реттеуді жетілдіру, сақтандыру, банк және микроқаржы мәселелері бойынша бірыңғай қаржы омбудсманы институтын құру, сондай-ақ ислам банкингі үшін шарттарды кеңейту көзделген», — деп атап өтті депутат.
Бұдан басқа, ұлттық сандық қаржы инфрақұрылымын құру, сандық теңге мен сандық активтердің айналымы үшін құқықтық негіздер енгізіледі.
